كيف تعرف صديقك؟!!!

الصداقة كلمة صغيرة لمعني كبير جدا كبير جدا اذا استطاع الانسان تكوينه قد ملك الدنيا بين يديه واذا فشل فيه فقد فقد الكثير في حياته ، فقيمة الصداقة كبيرة جداااااااااااا لمن يقدر قيمتها هي ليس مجرد كلام "صديقي صديقي ....................، ولكنها احساس وفعل ، فكثيرا مانخلط بين مصطلحات كثيرة بين الصداقة ، الزمالة ، الصحوبية بالعامية
ولكني اري ان الفرق بينهما كبير جدا فزميلي هو الذي يمكن ان افقده في أي وقت واي مكان وكذلك صاحبي فقي مجرد علاقات عابرة وقتية نتاثر بها نعم ولكننا علي يقين اننا في يوم يمكن ان تنتهي ، قد نحزن عليها نعم ولكن تاثيرها لكن يكون بنفس درجة فقدان صديق .............. ، وكلمة صديقي غالية جدا لاتقال لاي فرد ولكن لفرد يستحق
فقد قال الشعراء عن الصداقة :
صديقي من يقاسمني همومي .. ويرمي بالعداوة من رماني
ويحفظني إذا ما غبت عنه .. وارجوه لنائبة الزمان

وقال المتنبي

شر البلاد بلاد لا صديق بها .. وشر مايكسب الانسان مايصم

وقال اخر

لاشيء في الدنيا أحب لناظري .. من منظر الخلان والاصحاب

ولذلك فان اختيار الصديق ليس بالعملية السهلة البسيطة ولكني اراها من اصعب المراحل في حياة الانسان فالفرد لايستطيع ان يختار ابوه وامه واخوته ولكن يستطيع ان يختار بدقة صديقه فمن هو الصديق الحقيقي ومن هو ذلك الشخص التي اقبل ان يشاركني افارحي واحزاني واعتبره جزء مني

قالوا ان الصديق الحقيقي هو

الصديق الحقيقي : هو الصديق الذي تكون معه, كما تكون وحدك اي هو الانسان الذي تعتبره بمثابة النفس

الصديق الحقيقي : هو الذي يقبل عذرك و يسامحك أذا أخطأت و يسد مسدك في غيابك

الصديق الحقيقي : هو الذي يظن بك الظن الحسن

و أذا أخطأت بحقه يلتمس العذر ويقول في نفسه لعله لم يقصد

الصديق الحقيقي : هو الذي يرعاك في مالك و أهلك و ولدك و عرضك

الصديق الحقيقي : هو الذي يكون معك في السراء و الضراء و في الفرح و الحزن و في السعةِ و الضيق و في الغنى و الفقر

الصديق الحقيقي : هو الذي يؤثرك على نفسه و يتمنى لك الخير دائما

الصديق الحقيقي : هو الذي ينصحك اذا راى عيبك و يشجعك اذا رأى منك الخير ويعينك على العمل الصالح

الصديق الحقيقي : هو الذي يوسع لك في المجلس و يسبقك بالسلام اذا لقاك و يسعى في حاجتك اذا احتجت اليه

الصديق الحقيقي : هو الذي يدعي لك بظهر الغيب دون ان تطلب منه ذلك

الصديق الحقيقي : هو الذي يحبك بالله و في الله دون مصلحة مادية او معنوية

الصديق الحقيقي : هو الذي يفيدك بعمله و صلاحه و أدبه و أخلاقه

الصديق الحقيقي : هو الذي يرفع شأنك بين الناس و تفتخر بصداقته و لا يخجل من مصاحبتك و السير معك

الصديق الحقيقي : هو الذي يفرح اذا احتجت اليه و يسرع لخدمتك دون مقابل

الصديق الحقيقي : هو الذي يتمنى لك ما يتمنى لنفسه

ونظرا لقيمة الصداقة فقد شغلت بال الفلاسفة وحاولوا تفسيرها ووضع التعريفات لها ومنهم ارسطو فقد قال ان :"الصداقة هي عطف متبادل بين شخصين حيث يريد كل منهما الخير للأخر مع العلم بتلك المشاعر المتبادلة فيما بينهما"

والصديق هو من يعيش معك والذي يتحد وإياك في الأذواق والذي تسره مسراتك وتحزنه أحزانك وبذلك تقوم الصداقة على المعاشرة والتشابه والمشاركة الوجدانية
والصداقة هي إحدى الحاجات الضرورية للحياة لأنه لا يقدر أن يعيش احد بلا أصدقاء مهما توفرت له الخيرات فالأصدقاء هم الملاذ الذي نلجأ إليه وقت الشدة والضيق والصداقة ضرورية للشباب لأنها تمده بالنصائح وهي مهمة للشيخ تعينه حيث يتقدم العمر ويضعف البدن

ويقول أرسطو قوله الرائع " متى أحب الناس بعضهم البعض لم تعد حاجة إلى العدل غير أنهم مهما عدلوا فإنهم لا غنى لهم عن الصداقة"

كما يقول :"من كثرت أصدقائه لا صديق له لان الإنسان لا يستطيع أن يحافظ على صداقات كثيرة "

وفي محط بحثي ومحاولة تفسيري لمعني الصداقة قابلتني قصة اعجبتني جدا جدا واعتبرها نموذج معبر فعلا لابد ان يحتذي .............
تدور القصة في ساحة المعركة والقتال
وفي حوار بين جندي ورئيسه
قال الجندي لرئيسه: "صديقي لم يعد من ساحة المعركة سيدي، أطلب منكم السماح لي بالذهاب والبحث عنه."
"الإذن مرفوض"!!، وأضاف الرئيس قائلاً، “لا أريدك أن تخاطر بحياتك من أجل رجل من المحتمل أنّه قد مات".
الجندي، دون أن يعطي أهميّة لرفض رئيسه، ذهب وبعد ساعة عاد وهو مصاب بجرحٍ مميت حاملاً جثة صديقه.
كان الرئيس معتزاً بنفسه: "لقد قلت لك أنّه قد مات! قل لي أكان يستحق منك كل هذه المخاطرة للعثور على جثّة!؟!"
أجاب الجنديّ محتضراً: "بكل تأكيد سيدي! عندما وجدته كان لا يزال حياً وأستطاع أن يقول لي: كنت واثقاً بأنّك ستأتي!"
فالصديق: هو الذي يأتيك دائما ًحتى عندما يتخلى الجميع عنك...

من هذه القصة والكلام المسطور اقول هل هذه النماذج يمكن ان تكون موجودة علي ارض الواقع وهل يمكن ان يوجد صديق بهذه الدرجة من الحب والولاء لصديقه ، ومن الواقع اقول يوجد كثير من هذه النماذج قد تكون نادرة ولكنها موجودة فعلا ولكن الكل يتوقف علي طبيعة الرباط التي يربط هولاء الاصدقاء هل هو رباط خير ومحبة وحب في الله واجتماع علي حبه وطاعته ام مجرد علاقة والسلام يعني

علي الهامش
وفي لحظة استرخاء وتفكير ممزوج بالابتسامة اتذكر ذلك اليوم الجميل علي الرغم من كونه ملئ بالشجار والحزن والدموع واخيرا الضحك وبداية مرحلة جديدة وهامة في حياتي وحياتها "اقصد صديقتي" انه يوم 22 من احدي الشهور الشتوية وسط الامطار والبرد حيث اعتادنا الخروج للدرس ، قد نكون كنا اصحاب منذ فترة طويلة نتقابل نتعانق نتشاجر نتناقش نلعب علاقة عادية ، حتي ذلك اليوم التي تشاجرنا سويا لسبب اتفه مايكون بعدها تكونت علاقتنا وسط دموع حارة نادمة علي ذلك الشجار ولائمة لنفسها للتسبب في زعل الطرف الاخر ومنه كانت بداية مرحلة جديدة الا وهي بداية صداقة عميقة بمعني الكلمة بدايتها يوم 22 (احب الارقام الينا) عنوانها ( الطاعة لله - الحب – الاخلاص – التعاون – الصراحة - الايثار ) مدتها (الي ان نواري التراب) محذورتها (الشجار – النفاق – الكذب).
واقسم بالله انها من اجمل ماحدث في حياتي فقد تعلمت منها الكثير وساعدتني الكثير ، فهي بمثابة نفسي عندما اتحدث اليها ، انها فعلا الصداقة الفعلية بالمعني الجدير ان نقول عنه صداقة حقيقية يارب ادمها .....................

عيد سعيد

السلام عليكم

كل سنة وانتم بالف خير وصحة وسلامة ، ويارب يكون مبارك علي جميع المسلمين

ماهي حدود الكتابة..?!

عبر عن نفسك ، دع قلمك يتحدث ، الكتابة خير تعبيرعن الذات ، المدونة مذكرة شخصية .............، كانت هذه الكلمات تدور بخاطري عندما قررت ان انشئ مدونتي ، ولكن عند الدخول الي الواقع الفعلي وبدات اكتب في الموضوعات التي تمنيت ان اكتبها وجدت نفسي اقف واعيد التفكير.
وانا اقصد هنا بالعنوان "حدود الكتابة" ماهي حدود تعبير الانسان عن نفسه في المدونة ، فقد اثار ذلك الموضوع الي العديد من الاسباب قد تكون نابعة من داخلي عندما يقف قلمي (اقصد الكيبورد) كثيرا وانا اكتب للمدونة واقول لا الجزء ده مينعش اكتبه ، وعندما احذف البوست بعد تظبيطه واقول لا مش مكانه ده ، او من خلال مدونات الاخرين التي تترواح بين الجرأة الشديدة وبين الوسط وبين الخجل الشديد في التعبير عن النفس (واضع تحت هذه النقطة مليون خط) ، او من تعليقات الاخرين ان المدونة لا تنقل شخصيتي للقارئ (وانا شخصيا لما ادخل اي مدونة اريد بداية ان اعرف ذلك الشخص قبل ان اقرا اي شي له)
وفي جلسة صغيرة مع نفسي قسمت الموضوع الي ثلاث اجزاء
الاول : لو اعتبرت المدونة وسيلة اعلام (وان كانت شخصية) فاري انه لابد ان تكون مخطط لها ومحسوبة دون تخبط او عشوائية وتريد ان تنقل صورة لشخصيتك للناس بمعني انا عايزة ان الناس يقولوا اني كذا (أي مااريد ان انقله للآخرين عن شخصيتي أو اتجاهاتي تجاه المواقف المختلفة)
وفي هذا الجانب ايضا لابد ان تتيحها للجمهور دون أن تتضايق إذا دخل عليها شخص غير مرغوب أو أشخاص لا تريد أن يعروا هذه الجوانب عنك.
الثاني : إن المدونة تعتبر كراسة أو أجندة مذكراتك اليومية بكل ما تحمله من جوانب شخصية واتجاهات الرد تجاه المواقف ومشاعره ، أي يكتب كل ما يريد دون حرج أو خجل.
الثالث : وهو إن المدونة تقع في منطقة وسط بين وسيلة الإعلام بمعناها المعروف والمذكرة الشخصية وكما نقول في لغة الاعلام "الإعلام المواجهي" بمعني الاعلام الموجه في المضمون والجمهور (أي أريد أن انقل من خلال مدونتي أشياء معينة ولاشخاص معينة).
وحتى الآن أنا شخصيا لا اعرف في أي منطقة أنا أقف أو في أي مكان أحب إن أكون .

لقد فتحت الطريق واريد ان اصل الي حل ، في مجال الاعلام ينظر حتي الان الي المدونات علي انها خواطر شخصية تعبر عن راي صاحبها فهل هي ذلك فعلا ؟ واذا كانت كذلك لما نعجز عن التعبير عن ذواتنا ؟! .
معلش قد يكون الموضوع مش في محله اساسا بس صراحة صراحة الموضوع ده مضايقني اوي اوي ومش عارفة اخرج منه ازاي.............

فماذا تروا انتم ؟

تاج جديد

وصل اليا هذا التاج من الاستاذ وضاح صاحب مدونة لافتات علي الطريق


لومكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟

هو سؤال صعب طبعا ، لان وطن الانسان هو اعز شي عنده ، بس لاني احب مصر جدا ، فاستعير مقولة مصطفي كامل "لو لم اولد مصريا لوددت ان اكون مصريا" مصر كما يقولون ام الدنيا والانسان بطبعه يحن لامه فكنت احن لها ايضا ، اما بالنسبة للنظرة دلوقتي اقول المصريين مغلوبين علي امرهم في امور كثيرة علي الرغم من ذلك لايعفيهم من المسئولية.
لوكنت أوروبي أو غير مسلم بردو إيه نظرتك للعرب والمسلمين؟

اه ، لو كنت اوروبية او غير مسلمة ستكون نظرتي للعرب والمسلمين غير مستقاة طبعا من وسائل الاعلام الغربية بس بل كنت هطلع علي وجهة النظر الاخري وهي الاسلامية واحاول ان اصححها ، بس كنت هعطف عليهم الان بعد التدهور اللي وصلوا اليه الان بعد ان كانوا صناع الحضارة والامجاد
بس الحمد الله الذي خلقنا مسلمين وننطق بلغة القران

لو قالولك إنت بقيت رئيس جمهورية هتعمل إيه؟

ياسلام ياسلام ، ياحلاوة ياولاد انا بقيت الريس
بس ليه لا بصوا ايه اللي هيحصل اولا : هصادر كل البنوك وهاخذ الفلوس اللي فيها واوزعها علي الغلابة والمساكين اللي نايمين تحت كوبري رمسيس بالذات(يلا اهو انا الريس واولي برده من اللي بيسرقوها ويهربوا)
ثانيا : هاخذ بلطة كبيرة اوي وهكسر ماسورة الغاز اللي وصلة لاسرائيل وبسببها انبوبة الغاز هتبقي ب 28 جنيه
ثالثا : هاخذ عربات كبيرة اوي واروح اطلع الفول اللي مخزون في المخازن ومتشون ومستخبي عن الناس واوزعه علي كل بائعي الفول علشان السندوتش ميغلاش 25%
رابعا : هخلي التعليم مجاني خالص وخاصة لطلاب الدراسات العليا علشان لما يحبوا يعملوا ماجستير مايضطروش يكلفوا اهلهم او يدخلوا في جمعية ويدفعوا بالالاف وهما نفسهم يعملوا حاجة حلوة
خامسا : لما ان شاء الله اتجوز واجيب عيال مش هفرد حد منهم علي الناس واقول لهم لازم ده يكون الريس من بعدي
سادسا : هوفر حاجات كثيرة اوي للشعب الغلبان ده (السلع الاساسية – المياه – الصرف الصحي( ولا طفح المجاري)- ووووووووووووووو)
سابعا : هخصص جزء كبير من الميزانية الخاصة بالدولة لصالح الشعب الفلسطيني والعراقي والكشميري واخواننا في الشيشان ووووووووووووو وانا بقي الريس وعارفة ان الفلوس اللي حيلتنا تعيشنا ملوك تغرق اللي حولينا
وفي حاجات كثيرة اوي هعملها غير مادية نظرا لغلبة النظرة المادية علي اعمالي بس المشكلة الاساسية عندنا مادية

لو كان ينفع ترجع طفل تاني وتخليك طفل علطول هترجع؟ وليه؟

اكيد هرجع بدون تفكير ، فالطفولة هي البراءة هي النقاء هي الحب هي التعبير دون تزييف هي روقان البال فالاطفال احباب الله وفي حد ميحبش يكون حبيب الله (اللهم اجعلنا يارب من احبابك واحباب رسولك الكريم )
وكمان امي وابي بيقولوا ليا انك كنتي طفلة شقية جدا جدا وحبوبة وكنتي مصاحبة اطفال الشارع كله (اما الان فاني غير اجتماعية اوي) وكنتي ذكية جدا (مش عارفة يظهر انهم شايفني الوقت غبية هما ادري برده

لو إنت طبيب وعندك مريض ميؤوس من حالته .. أيهما تفضل .. إنك تصارحه بالوضع وتقوله كل شيء بأمر الله في الاخر ولا تغرس فيه الامل لغاية لما يموت؟

للاسف لم اتمني في حياتي ان اكون طبيبة علي الاطلاق بالرغم من عظم المهنة (لاني اري ان اضعف لحظات الانسان وهو مريض وانا لااحب ان اري انسان في لحظة ضعف ، وكنت صراحة كل انسان مريض هشوفه هفضل اعيط جانبه وكنت هقلب المستشفي ماتم) بس مكنتش هقدر اصارحه ومكنتش برده هقدر اسيبه علي عماه فمش عارفة ممكن كنت هسيب حالته اذا لم اقدر اساعده

.

لوسمح لك برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟

يارب اوعدنا برفقته في الجنة ولا تحرمنا منه في الاخرة ، بس انا رخمة اوي ومكنتش هسيبه خالص ، كلمة واحدة دي ايه ، ولو اصريتم اوي هقول له "اني احبك احبك احبك وربي يحبك واحب ربي واحب رفقتك في الجنة برحمة ربي"

لوخطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟

كل ذلك بامر الله قال تعالى ( لله ملك السموات والأرض يخلق ما يشاء ويهب لمن يشاء إناثا ويهب لمن يشاء الذكور أو يزوجهم ذكرانا و إناثا ويجعل من يشاء عقيما انه عليم قدير ). ، وحتي انا كان الامر مؤكد بنسبة مليون المية فلم يغير ذلك من الامر شئ وساتمسك به اكثر من الاول

لوطلعت القمرهتكتب إيه عليه؟

هكتب عليه سبحان الله وده اولا اما ثانيا هكتب عليه ياقمر ياابو الاقمار نفسي اري مصر من خلالك في احسن حال واري الامة العربية ولاسلامية متوحدين من غير تدخل امريكي وعقد مؤتمر انابوليس

لوكنا في عصر ازدهار الأندلس كنت تتخيل نفسك إزاي؟

كنت هتخيل نفسي المستشار الاعلامي لطارق ابن زياد بس هل كنت هحتاج واسطة معتقدتش !!

لو هتسافر في أي مكان في الدنيا تعيش فيه هتروح فين ؟
مقدرش ابعد عنها واعيش في مكان تاني ابدا ، بس لو جت ليا مثلا فرصة لاكمال دراساتي برة هروح وهخلصها واقول يافكيك وارجع جري الي مصر امي

لوأنا مررت التاج ده لحد وما جاوبش عليه أعمل فيه إيه؟

هقول له اجبر بخاطري ربنا يجبر بخاطرك واعتبره هدية والنبي قبل الهدية

لو مررت التاج تمرره لمين ؟؟

لكل زوار مدونتي الكرام وده هدية ولازم تاخذوها

يوم بالف يوم

بعد فترة طويلة من الملل الشديد والبعد عن الاصحاب رفاق الدرب والعمر قررنا ان و2 من زميلاتي اللقاء وقضاء يوم مع بعض ، وده مكنش الهدف الوحيد طبعا اصل الحكاية ايه ان احدي زميلاتي كانت وعداني انا واحدي زميلاتي ان تعزمنا عزومة كبيرة من اول مرتب لها من الشغل .وفعلا لما قبضت اتصلت علينا لتؤكد العزومة والدعوة وطبعا احنا خلينا عندنا دم ورفضنا ده اول مرتب بس هي صممت وخاصة ان اول مرتب لها كان للنعنشة علي راي ماماتها وهتاخذ اده خمس مرات من باباها علي قفانا (اصلها استغلالية اوي اوي).
وامام الاغراءات طبعا مسكنا فيها بادنا وسنانا وقررنا الخروج ، واول ما اتقابلنا اتفقنا اننا نخليه يوم غير عادي في كل شي ، المهم بقي بدا اليوم في احدي الحدائق الجميلة اللي اول مرة اروح فيها وطبعا كان من اختيارها واللي كانت بعيدة اوي عنا انا وزميلتي الاخري اه مهي اصلها هي اللي هتعزمنا وكمان علشان معاها عربية (اصل البت راندا دي ياجماعة بنت عز ) المهم روحنا وقضينا وقت كويس مع بعض واتصورنا صور تحفة وانا طبعا اللي صممت ان اصور المناظر اللي موجودة في الحديقة بستعرض قدراتي التصويرية واللي اكيد هتكون نصف الصور ملعبكة .
بعد كده حسينا بالجوع الشديد خاصة وان سندوتشات راندا اللي ماماتها اعدتها لنا كنت قليلة وراندا طبعا اكلت نصفها وهي جايا (مفجوعة بقي) وقررنا ان نغرم البنت وعلي اقرب واشيك مطعم شاورنا ودخلنا ، وقبل ماندخل مروة (دي زميلاتنا اللي كانت معانا) اشترطت عليها ان تطلب ماتشاء وهي طبعا قالت بصوتها ذات الثقة:" طبعا طبعا اطلبوا كل الاكل اللي في المطعم انتوا بتكلموا في ايه" ، فقلت لها :"بلاش عنطظة فاضية امشي علي قدر الفلوس اللي في جيبك طب وربنا لو كلنا ومكنش معاكي فلوس هنقول ولا نعرفها" ، فرددت عيال فقرا يلا يلا ، اختارنا طرابيزة شيك وفي مكان بعيد وقعدنا نادينا الجرسون فجه فطلبنا الاكل وكلنا (علي فكرة كلت برده مسقعة اكلتي المفضلة وان كانت بطريقة مختلفة) وطبعا وسط تهزيق من مروة وراندا اللي افتروا في الاكل (اقول اكلتم ايه يامفاجيع بس انا احسن برده ومش هشهر بيكم علي المدونة).
وبعد مااكلنا الحمد لله شربنا عصير وكعت راندا الفلوس اللي كانت كثيرة طبعا
ورجعنا للحديقة مرة اخري وعملنا دائرة صغير منا احنا الثلاثة وقمنا بمناقشة موضوعات كثيرة اوي خاصة بنا والشغل والدراسة وكدا يعني ، ثم طرحت علينا مروة سؤال ماذا يفكر كل منا في هذه اللحظة اللي احنا كنا فيها وبكل صراحة وبدات كعادتها المتسرعة وخفة دمها مروة وقالت :"انا والله افكر الان الشهر الجاي راندا ممكن تزعمنا فين وعلي ايه" ، وطبعا كان لابد من رد سريع من راندا اللي قالت :"وربنا انتي بت مفترية انا هفضل اذلكم بالعزومة دي طول عمركم ، قال ايه عزومة تانية دا انا بموت وانا بطلع الفلوس من جيبي".
ثم جاء دور راندا فقالت :"بصراحة بصراحة انا بفكر الان اخلص الفلوس اللي انتي خليتوني اكعها هل اضربكم واخلص حقي ولا اعمل ايه ، ثم قالت والله انا بفكر الان في هذه اللحظة الجميلة اللي احنا فيها وازاي الايام بعدت بينا بعد ماكنا يوميا مع بعض صراحة احسن حاجة في الدنيا الصحبة الصالحة والله اتمني انا اكون معاكم في كل لحظة"وهنا قطعت الكلام انا ومروة وقلنا "ترام لا لا ياسلام علي الشاعرية ايه الرومانسية دي (اه نسيت اقول ليكم انا الاخت راندا بتموت في الشعر والادب الرومانسي ) .واخيرا جاء دوري :"انا بفكر الان هنحلي بايه بعد الاكلة الجميلة دي ياتري هنحلي من العبد ولا من تسيباس ، وبعد كده قلت بجد بجد مش عارفة في في دماغي حاجات كثيرة بفكر فيها وكلها مركبة ومش عارفة اعبر عنها غير اني مبسوطة الان وانتم معايا (هروب طبعا عادتي ولا هشتريها) وهي نفس ردهم عليا ".
وبعد كدة ادركنا اننا قعدنا كثير في الحديقة وقررنا الرحيل واحنا مش عارفين رايحين فين واثناء مشينا في الشارع مرينا علي سينما وهنا عرضت علينا راندا ان ندخل - تكملة العزومة مش احسان طبعا منها- (اه نسيت اقول انها عزمتنا واحنا ماشين علي ذرة مشوي) وطبعا مروة (عاشقة السينما) قالت :"اه اه ياريت ده في فيلم تحفة" فقلت لهم سينما ايه يامجانين احنا لازم نروح ولا عايزين بتوع البيت يطردونا وكمان انا عمري مادخلت سينما ولا افكر ادخلها من اساسه ، يلا يلا ياعيال" ، وهنا قالت راندا :"خلاص بلاها سينما" ، اما مروة فقالت :"وربنا عيال معقدة انتم هبل والله ده فيلم جميل اوي".
وبعد كدة راندا وصلتنا لاقرب طريق لنا وقالت واحنا بنودعنا :"بصوا بقي انا وكلتكم وشربتكم ووصلتكم ومحرمتكوش من حاجة بس اوعوا تنسوا وعلي فكرة دي كانت غلطة ومش هتكرر والله مني ابدا وهفضل اذلكم طول عمركم ، وربنا يسامحني في الغلطة دي .
بس صراحة كان يوم اكثر من رائحة واعتبره نوع من التنفيس شوية في ظل الملل اللي احنا فيه من التكرار وبقول يارب يارب يارنا (زي مابنقول لها) تزيدي قريب وتعزمينا تاني من غير ذل اصل احنا اخنا ذل بلي كلناه .
بس كده ده كان اللي حصل في اليوم لانه كان عاجبني اوي قلت احكي ليكم عليه.

ملاحظة هامة جدا جدا

في اليوم التالي لهذه العزومة مروة زميلتي بتتصل براندا فوجدتها تعاني من نزلة برد شديدة جدا جدا ومرحتش الشغل ( وطبعا انا ادركت ان سبب هذا المرض ليس البرد فقط ، ولكن الفلوس اللي كعتها)فالف الف سلامة عليكي ياموكلانة ومشربانة ومفسحانة .

كيف تفكر بوضوح؟

لاني مش عارفة افكر ، قعدت ابحث شوية علي النت عن كيفية التفكير الصحيح ( مش لاني طبعا هنفذ اللي ممكن الاقيه) ولكن من باب حب الاستطلاع ، فلقيت المقال ده بموقع لها اون لاين (للامانة ) عجبني علي الرغم من الاسلوب العلمي المكتوب به وللي فيه اجزاء صعب تنفيذها خاصة عندما يكون امام الانسان العديد من البدائل والمغريات خاصة لو كانت مادية و"وبركز علي مادية" يقول المقال

يعتبر التفكير من أهم العمليات العقلية لأنه يهدف لإيجاد الحلول للمشكلات النظرية والعملية التي يواجهها الإنسان في حياته، كما أن التفكير يساعد الإنسان على تطوير نفسه باستمرار فبالتالي يساعده على النجاح والتقدم للأمام، ويعد التفكير كعملية معرفية عنصراً أساسياً في البناء العقلي - المعرفي الذي يمتلكه الإنسان ويتميز بطابعه الاجتماعي وبعمله المنظومي.
ولكن ما هو التفكير؟ وما الخصائص العامة له، وكيف يمكن التفكير بوضوح؟
ما هو التفكير؟
التفكير بمعناه العام، هو نشاط ذهني أو عقلي يختلف عن الإحساس والإدراك ويتجاوز الاثنين معاً إلى الأفكار المجردة. وبمعناه الضيق والمحدد هو كل تدفق أو مجرى من الأفكار، تحركه أو تستثيره مشكلة أو مسألة تتطلب الحل، كما أنه يقود إلى دراسة المعطيات وتقليبها وتفحصها بقصد التحقق من صحتها، ومعرفة القوانين التي تتحكم بها والآليات التي تعمل بموجبها.
خصائص التفكير
يتميز التفكير الإنساني بصورة عامة بالخصائص الآتية:
1) التفكير واللغة يؤلفان وحدة معقدة لا تنفصم؛ فاللغة واسطة التعبير عن التفكير، بل هي الواقع المباشر له، وهي تضفي عليه طابعاً تعميمياً؛ فمهما يكن الموضوع الذي يفكر فيه الإنسان ومهما تكن المسألة التي يعمل لحلها فإنه يفكر دوماً بوساطة اللغة؛ أي أنه يفكر بشكل معمم.
2) يتسم التفكير بالإشكالية؛ أي أن التفكير يتخذ من المشكلات موضوعاً له؛ ولهذا يختصر العلاقات وكيفية انتظامها في حالة مشخصة أو في أي ظاهرة تؤلف موضوع المعرفة أو يبدأ التقصي عادة بالاستجابة إلى الإشارة الكلامية، ويعد السؤال الذي تبدأ به عملية التفكير هو تلك الإشارة؛ ففي السؤال تصاغ مسألة التفكير، والسؤال هو أكثر الأشكال التي تبرهن على وحدة التفكير واللغة، وما التفكير سوى مسألة محددة صيغت في قالب سؤال. والبحث عن إجابة السؤال المطروح يكسب عملية التفكير طابعاً منظماً وهادفاً.
3) يعد التفكير محوراً لكل نشاط عقلي يقوم به الإنسان وهذا ما يميز الناحية الكيفية - العملية الذهنية حتى عند طفل في الثانية من عمره، إذ ما يزال يتعلم اللغة - عن الأشكال البدائية للتحليل والتركيب التي تتمكن الحيوانات الراقية من القيام بها.
4) للتفكير مستويات عدة، فقد يتحقق في مستوى الأفعال العملية أو في مستوى استخدام التصورات أو الكلمات أي على شكل مخطط داخلي ويشتمل التفكير على عدد من العمليات التي تتصدى لمعالجة المعلومات بطرائق متنوعة مثل (التركيب، التحليل، التصنيف، المقارنة، التجريد، التعميم... الخ) ولكي يتمكن الإنسان بوساطتها من حل المسائل المختلفة التي يواجهها نظرية كانت أم عملية، عليه أن يوظف المنظومة الكاملة لهذه العمليات تبعاً لشروط ولدرجة استيعابه لها.
الخصائص الفردية المميزة للتفكير
إن الملاحظة اليومية لسلوك الناس من حولنا وبخاصة في التعليم تشير إلى مدى اختلافهم في خصائص تفكيرهم؛ فبعضهم يتميز بسرعة التفكير وأصالته ومرونته وعمقه وبعضهم الآخر يتميز ببطء التفكير وعدم القدرة على تجاوز الأطر والقوالب التي حفظها، وبالتالي يعجز عن إدراك العلاقات الجوهرية في ظواهر متشابهة مع أنها ترتبط فيما بينها بعلاقات مشتركة.. إذن هناك خصائص كثيرة للتفكير تتعلق بالفروق الفردية بين الناس سنكتفي بذكر أهمها:
1) الأصالة:
إن الأصالة في التفكير تتجلى أكثر ما تتجلى في القدرة على رؤية المشكلة وتحديدها وطرحها على شكل مسألة والقدرة على إيجاد حل ملائم وجديد ومبتكر لها اعتماداً على قواه، وقد أشار (جيلفورد) إلى أن أصالة التفكير تعني إنتاج ما هو غير مألوف، ما هو بعيد المدى، ما هو ذكي وحاذق من الاستجابات
2) المرونة:
مرونة التفكير تعني القدرة على إجراء تغيير من نوع ما: تغيير في المعنى أو التفسير أو الاستعمال أو فهم المسألة أو إستراتيجية العمل أو تغيير في اتجاه التفكير بحيث يؤدي هذا التغيير إلى العثور على الحل الملائم لشروط المسألة موضوع التفكير. وقد ميز (جيلفورد) نوعين من المرونة في التفكير: المرونة التلقائية، والمرونة التكيفية.
3) السرعة (الطلاقة):
تبدو السرعة في التفكير لازمة عندما يكون من الضروري اتخاذ قرارات مهمة خلال وقت قصير جداً أثناء الحروب والكوارث، والمفاجآت المختلفة والمواقف المشكلة التي تتطلب حلولاً عاجلة وبسرعة خاطفة وهذه الحالة غالباً ما يواجهها التلميذ - المتعلم في الصف وخارجه، كما أن هذه المواقف هي التي يتعامل معها عمال مراكز التوجيه ولوحات التحكم وقادة وسائط النقل الأسرع من الصوت... الخ.
وتتأثر السرعة في التفكير بعوامل عدة وبالعوامل الانفعالية بشكل خاص لكن تأثير الانفعالات والتوتر والقلق متفاوت للغاية، فقد تؤدي إلى نتائج سلبية تعيق جريان التفكير وتكون سبباً في بطئه وضعف نتائجه وقد تنشطه وتزيد من مردوده.
إن العلامة المميزة لأي تفكير - بغض النظر عن خصائصه الفردية - هي القدرة على تمييز ما هو جوهري والتوصل إلى تعميمات جديدة، فالتفكير لا يقف عند تقرير وجود هذه الظاهرة أو تلك مهما كانت براقة وممتعة وجديدة ومفاجئة.
والآن نعرض عليك كيف تفكر بوضوح:
1. اختر التوقيت المناسب
يعمل الدماغ بطريقة غامضة؛ فبينما يفكر البالغون بطريقة فعالة في الصباح يفكر المراهقون بطريقة أكثر فعالية أثناء المساء. اختر الوقت الذي تفكر فيه بطريقة فعالة واستغله للقيام بالأمور المعقدة، واختر الوقت الذي تجد فيك ذهنك ص
2. احصل على تعليم جيد
افياً.يقول العالم النفسي دين كيث سمونتون: التدريس له تأثير إيجابي على الإبداع خلال السنة النهائية. ابحث عن شيء أنت تبدع فيه.
3. استمع لنصيحة الكتابة
واكتبها واعلم أن "أرخص أنواع الحبر يدوم أطول من أقوى ذاكرة"، فكتابة الفكرة تثبتها وتبرزها وتجعلها واضحة أمامك، وسهلة التنفيذ في المستقبل، وتساعد على تسلسل الأفكار وتتابعها.
4. كن يقظاً
أظهرت الأبحاث أن تناول كمية من الكافيين بمقدار كوب من القهوة يمكن أن يساعدك على التركيز، ولكن إذا كنت مصاباً بالقلق فابتعد عن المحفزات التي قد تسبب نتائج عكسية، وحافظ على نشاطك البدني والذهني من خلال عدد معقول من ساعات النوم، وممارسة الرياضة التي تساعد على الذهن الصافي.
5. اربط الذكريات الجديدة بالذكريات الأقدم
تقول الدكتورة دينيز بارك، "للحصول على ذاكرة أقوى قم بربط الذكريات الجديدة بتلك القديمة". وتضيف: "استعمل ذكرياتك القديمة كأساس للذكريات الجديدة"، واستخدم خاصية ربط الأشياء والموضوعات بعضها ببعض، فهذا يساعدك كثيراً على التذكر بسهولة.
6. تدرب، تدرب، تدرب
التعلم والمهارات الجديدة التي يتم التدريب عليها مراراً وتكراراً تسبب تغيرات داخلية في الدماغ. وأظهرت دراسة جديدة أن الجلسات التدريبية الدورية ساعدت متطوعين في السبعينيات من أعمارهم بالعمل بشكل أفضل وتحسين إدراكهم ومهاراتهم التي كانوا يملكونها قبل سبع سنوات.
7. أعط أفكارك فرصة
العديد منا يملكون القدرة على تقييم الحقائق واتخاذ القرارات بسرعة، بينما الإبداع يتطلب منح الأفكار فرصة وطرحها بطريقة مبتكرة حتى لو كانت غريبة.
8. امتهن مهنة ثقافية وصادق الأذكياء
تقترح إحدى الدراسات المثيرة من بولندا بأن الناس الذي تتطلب مهنهم التفكير هم على الأرجح الأكثر لتحمل المستويات العليا من الإدراك في حياتهم، كما أن الزواج من شخص ذكي قَد يوفر تحفيزاً مستمراً.
9. عرّض نفسك لتجارب متعدّدة
غالباً ما يظهر الإبداع في إيجاد الحلول من الأشياء البسيطة، مثلاً القطعة المعدنية التي نثنيها لفتح علب المشروبات الغازية، مستوحاة من قشرة الموز.
10. تعلم من العباقرة
يعرض مايكل غيلب مؤلف كتاب (كيف تفكر مثل ليناردو دا فينشي) عدة إستراتيجيات في كتابه، استخدمها رجل عصر النهضة لتحفيز دماغه، ومنها تعلم مهارة الرسم باليد اليسرى، وألعاب الخفة.
11. انتبه
هل غالباً ما تنسى اسم الشخص الذي تعرفت عليه للتو، هذا لا يعني أن ذاكرتك سيئة، ولكن تركيزك ضعيف، ركز، انتبه واربط الاسم فوراً في ذاكرتك فوراً.
12. مرن جسمك لتحسن دماغك
يعتقد عدد متزايد من الباحثين أن التمارين الرياضية السويدية يمكنها أن تزيد فعالية كل شيء من الأداء المدرسي إلى سرعة توصيل العصب، وتوفر هذه الآليات الأوكسجين المجهز والمغذي إلى الدماغ،
بالإضافة إلى توفير دفعة من المركبات الطبيعية، التي تروج لنمو خلايا الدماغ.
13. جرب شيئاً جديداً
قبل وفاته بقليل، قام الفنان الانطباعي، ماتيس بتغير مساره الفني من الفرشاة إلى المقص، واستطاع أن ينجح بمقصه.. يقول الخبراء إن التغيير يحفز العقل على الإبداع والابتكار، فجرب شيئاً جديداً ولعلك تبرع به بإبداع.
14. أوقف التشتت
إذا كنت محاطاً بالمحفزات والأمور التي قد تشتت انتباهك، ابتعد عنها أو أوقفها.. مثلاً ادرس في المكتبة إذا كنت تعرف أن المنزل مليء بالضجة، ببساطة ابتعد عن المثيرات التي تشتت انتباهك وتؤثر على تركيزك.

تاج جديد

تاج جديد برده من شيماء ايه حكايتك مع التاجات دي؟

اسم مدونتك؟
نهياوية

لماذا اخترته ..وماهي نيتك من وراء اختياره؟

يعني لاني من ناهيا فمنها جاء الاسم كنسبة لقريتي ونوع من الانتماء لها والتعبير عن حبي واعتزازي بها
هل فكرت في إغلاق مدونتك؟ والسبب؟
لا خالص اغلقها ليه ، انا بعتبرها نوع من انواع التنفيس عما بداخلي وان كان بشكل محدود
صورتك في المدونة ورمزيتها ؟
صورة لبنوتة صغيرة ، واخترتها علشان عجبتني بس كده

لماذا دخلت عالم التدوين من الاساس؟
انا قولت قبل كده انه نوع من التنفيس ، وكمان عجبتني الفكرة فحبيت انفذها

جمله قيلت لك فى وصف مدونتك؟
يعني مش عارفة اوي ، بس اشادوا بيها

التعليقات بالنسبه لك ,اهميتها؟
طبعا ليها اهمية كبيرة لانها بتمثل مكمل عملية الاتصال وهي رجع الصدي اي رد الفعل علي الكتابات
احلى بوست كتبته ، لماذا؟
"عودي ياصديقة عمري" وده لاني فعلا عبرت بصراحة عما بداخلي
أفضل بوست قرأته؟ وضع لينكه؟
والله ياجماعة كتير قوي وصعب اختار واحد بس منها
أفضل مدونة قرأتها؟

والله برده كثير اوي ، وكمان في كل مدونة في حاجات بتعجبني وحاجات لا
حد قل ادبه فى التعليق إيه رد فعلك؟
لا خالص ، مفيش حد عمل كده خالص ، انا برده اعرف حد بيقل ادبه في ايه ياشيماء؟
أسوأ مدونة؟

كثير اوي اوي ياجماعة النت مليان بلاوي من المدونات دي
أسوأ بوست أسوأ مدون؟

كثير اوي بس اي بوست او مدون يخرج عن حدود الاخلاق والادب
هيحصل ايه لإيميلك لما تموتى ؟

هيموت طبعا لانه مرتبط بصاحبته
اديتى الباسوورد لحد قبل كده؟
لا
كانت إيه طبيعة علاقتك بيه؟

انما قولت لا ، ركزوا معانا ياجماعة ، بس عادي يعني ممكن اديه لحد اثق فيه بس انا بخاف من حاجة ذي دي لاني حفظة علية شوية ابحاث وموضوعات ، اما للي في دماغك لا ياشيماء

اسمك ؟
معلش مش عايزة اقوله
اسم مشهور ببيه وسط اصحابك؟

هو اسمي الحقيقي بس طبعا مع الدله بتاعه وبرده مش هقوله
عمرك؟
عيد ميلادي كان من كام يوم ، وانا الان عندي 22 سنة
برجك ؟

مع اني مش مقنعة بموضوع الابراج ، بس انا برج الاسد وزميلاتي بتوع الجامعة كانوا تقريبا يوميا بيتبعوا اللي فيه ويقولولي وطبعا كله كان بيبقي خطا ، بس هم كانوا بيحاولوا يلفوا ويدورا علشان يركبوه علي المواقف
دراستك؟ مجالك؟

الاعلام ، الصحافة
شخصيتك نوعها إيه؟
ليه الاحراج ده ياجماعة بصوا شخصيتي مش اجتماعية بس يعني انا شايفة نفسي متفائلة جدا

السفر بالنسبة لك؟
حلم نفسي احققه .. بيني وبينكم ياجماعة نفسي اسافر بصوا بقي مش لاي مكان لفرنسا واكمل دراساتي العليا هناك ، اما السفر علي المستوي الداخلي انا مرضاش باقل من شرم الشيخ اللي شكلي مش هشوفها
وقت فراغك بتعملى فيه إيه؟
يعني هو مش كبير ، بس ممكن القراءة ، الانترنت بس في ملاحظة ان وقت فراغي ده بيكون خارج منه غسل المواعين في المطبخ واللي دائما بهرب منها والحاجات دي يعني
المود بتاعك؟

فرش في الاغلب
الاكلة المفضلة؟
ياجماعة بلاش تفكروني ، بس هي المسقعة بلا منافس
الصفات اللي أخدتها من بابا؟
مش عارفة والله ياجماعة ، بس اكيد في حاجات كثير
الصفات التي أخدتها من ماما ؟

حاجات كثير اوي اوي وعلي راسها التفاؤل بس انا زايدة فيه اوي

اكتر ست حاجات بكرهها؟

الكذب بكرهوه اوووووووووي

اليهود

نزلات البرد (اصل انا الان ياجماعة عندي نزلة برد تمام )

الكأبة مبحبهاش خالص ولما اكون مكتئبة ممكن اكره نفسي عادي يعني

غسل المواعين في المطبخ

حاجات كثيرة تاني بس صراحة مش عارفة اجمع

اكتر ست حاجات بحبها؟
الله سبحان وتعالي ورسوله (ص)

ابي وامي

اخواتي وصديقتي عشعش اللي بعتبرها في نفس المكانة

اصحابي وباقي اهلي

المسقعة

التفاؤل والصدق
الشغل بالنسبة لك؟

نصفي الاخر ، علي الرغم من انني مش عارفة لم اصل للي انا عايزاه يعني ممكن اتركه في اي لحظة (ده بيني وبينكم اوعوا تقولوا لحد)

بنت روشة طحن

قد تمر علي الانسان العديد من المواقف مرور الكرام ويعديها بس انا بقي رخمة شوية من ساعة ماعملت المدونة دي وبحب اكتب في كل حاجة ، شوفوا ياجماعة انا هحكي ليكم موقف بسيط كده شوية قد يكون عادي بالنسبة للكثير بس انا شايفاه غير عادي وخاصة انه مش بيتكرر كثير عندنا في ناهيا بصوا ياجماعة الموقف بيبدأ وانا راكبة الميكروباص من ناهيا واللي هيوصلني للشغل فاذا ببنت تركب بجانبي انا صراحة لم ادقق فيها كثيرا في البداية عادي يعني ، بس واحنا قاعدين في امان الله الميكروباص ماشي اذا بي اسمع صوت عالي يقول "اووووف ايه الرائحة الوحشة دي" فالتفت اليها والتفت الجميع معي ، طبعا علشان صوتها العالي ده اولا وثانيا نظرا لانه مكنش اساسا في رائحة اوي وحشة بالشكل ده بس احنا كنا ماشين علي طريق زراعي ورائحة "مش" هي اللي موجودة فانا قلت انه يعني يمكن لاني بحبه اكون غلطانة في الاستنكار ، بس الركاب اللي حولي استغربوا اوي حتي ان رجل قال "يرحموا ويسامحوا" انا معرفش يقصد ايه ، فنظرت اليه البنت نظرة ارف ولم ترد ثم التفتت الي وقالت لي "لو سمحتي معاكي برفن او اسبريه" فرديت عليها "للاسف لا" وخلص الجزء ده.
جزء اخر انا في الميكروباص غالبا ما اجلس بجوار شباك يعني بالصدفة وغالبا بخلي الشباك مفتوح نصف علشان يعني الهواء بيكون جامد وكمان بيطير الحجاب اللي انا لابساه وكمان الجو الصبح بيمون برد شوية ، فجاة بصوت عالي وكانها تريد ان يلتفت كل من حولها قالت لي "افتحي 00 افتحي الشباك معرفش انتي متحملة الكتمة دي ازاي" فقلت لها "اسفة علشان الهواء شديد ، ولا اقول ليكي ممكن تيجي مكاني وافتحي براحتك" لترد علي "لا لا انتي افتحيه وخليكي مكانك علشان عيني بتوجعني من التراب اللي بيدخل" مع العلم انها كانت ترتدي نظارة شمس.صراحة انا اتغظت جدا جدا بس لاني مبحبش احرج حد اينا كان مسكت نفسي ورديت عليها بهدوء "انا قلت اللي عندي" وكان في يدي مجلة بصيت فيها .
جزء ثالث ، بعد الموقف الي فات وعلي الرغم من انني مش طيقاها خالص ، وانا اقرا في المجلة سالتني "انتي بتقراي في ايه؟" صراحة سكت شوية وبعدين قلت ليها دي مجلة ، فقالت اسمها ايه "قلت لها اسمها وكانت بعنوان (صحتك بالدنيا) " ، فردت علي باسلوب وحش وكانها تقرا كل المجلات يعني "انا اول مرة اسمع عنها" ، فبرده مسكت نفسي وقولت لها "لا دي مش موجودة في السوق ده مشروع تخرج " ، فردت "انا برده بقول كده" وفجاة وجدتها تاحذ المجلة من يدي دون استذان وتقلب فيها بوجه عبوس - والله ياجماعة ده دون مبالغة- صراحة ساعتها دمي فار ومقدرتش امسك نفسي ، فقلت لها " من المفروض انك تستاذني قبل ماتاخذيها ده " ساعتها " قالت لي اه معلش نسيت نسيت وكمان خليكي روشة" ، فقلت لها روشة دي صراحة مش روشنة دي جرأة زايدة اوي" فردت علي "كبري كبري" ، مرتضش ارد عليها وبصيت في المجلة مرة اخري.
جزء اخر انها طول الطريق وكل شوية تخرج مراة من شنطتها وتبص فيها وتعدل ملابسها ، في البداية قلت عادي يعني بس التكرار كان رخم اوي حتي ان ماحولها كانوا بيبصوا لها بارف.
ثم فجاة تقول للسائق "قف هنا لوسمحت وهنا كنا في منطقة ارض اللواء ، فقامت وهي نازلة تقول لي "هاي هاي" وكاننا اصحاب مثلا مع اني صراحة كنت قرفانه منها اوي .اول مانزلت الكل علق علي سلوكها اللي يقول "ربنا يهديها " وانا كنت معاه في القول ، واخر يقول "علي الدنيا السلام مبقاش في ادب" ، وثالث يقول "هي البنت دي من ناهيا ؟ وبنت مين؟"بصوا انا لااعرفها بس انا لااعتقد انها من ناهيا لاني شايفة انه لايوجد في ناهيا بنات بالشكل ده والتصرفات دي .
بس كده هو ده الموقف بس صراحة اقدر اقول عليها في النهاية "بنت روشة طحن" .

ضريبة النجاح

صدق اللي قال لكل شئ ثمن حتي النجاح ، اصلي ياجماعة الحمد لله نجحت بعد شوية لخبطة في النتيجة وشوية نكد وحزن من هذه اللخبطة انما الحمد لله الخطا تصحح ونجحت وخلصت التمهيدي ، وطبعا بعد النجاح لابد الكل لازم يبارك من الاهل والزملاء والاصدقاء ، انما ايه انا زميلاتي النهياويات استغلاليات اوووووووووووووووووووووووووووووووووووووي لدرجة لاتتخيلوها - معلش يازميلاتي بقول الحق - بصوا انا احكي ليكم اللي حصل وانتم احكموا .في البداية احدي زميلاتي عرفت اني نجحت بالصدفة عندما كانت بتتصل بيا وانما ايه قامت بدور وكالة رويترز للانباء ونشرت الخبر لكل زميلاتنا فالكل صراحة قام بالواجب وبارك لي في التليفون وقالوا ليا انهم هيعدوا عليا بعد المغرب وجه الميعاد ولقيت هجوم من زميلاتي ، المهم جيت اقوم بواجب الضيافة وقولت ليهم "امامكم ثلاث اختيارات اما ان تشربوا شاي او نسكافيه او كاكاو" ودول المشروبات اللي كانت موجودة في البيت لكن احداهن ثارت ونادت علي امي وشهدتها علي وقالت لها "شوفي بنتك الجلدة نجحت وعايزة تشربنا شاي " وامي ماخلصهاش وشربوا الحاجة الساقعة وبعد شوية قالت لي نفس الزميلة قومي اعملي لنا كاكاو ، وصراحة ياجماعة ومن غير تحريف قمت عليها انا واحدي زميلاتي وظبطناها بلاش بقي اقول ازاي ، والمهم وهما مروحين قالوا لي تعالي اتمشي معانا شوية فلبست وخرجت معاهم وعلي اقرب محل عصير وقفوا وشربنا العصير وراحوا قايلين ليا حاسبي يا(.....) وطبعا احنا كنا في الشارع فحاسبت انما ايه اول ماخرجنا من المحل لااقول لكم عملت ايه ، بس اقول ليكم حاجة انا بعمل فيهم اضعاف ذلك.موقف اخر ، احدي زميلاتي امس جاءت لي وهي جاية لقيتها جايبة في ايدها لتر حاجة ساقعة في ايدها وقالت لي مبروك يا(....) شوفي انا كلي ذوق ازاي انا جايبة ليكي حاجة ساقعة ، صراحة انا مصدقتش ماانا عارفة مقالب زميلاتي ، المهم بعد قاعدة طويلة معها خرجت اوصلها لاخر الشارع بتاعنا وبعد السلام للتوديع نادت عليا "(....) اه نسيت اقول ليكي اوعي تنسي تحاسبي علي ثمن الحاجة الساقعة انا قلت لجاركم صاحب السوبر ماركت انه علي حسابك" وراحت ماشية بسرعة دون انتظار ردي وهي بتضحك وسط غيظ مني ، وفعلا وانا راجعة بسال صاحب المحل لقيتها فعلا لم تحاسب عليه وقالت له علي انه علي حسابي ، صراحة معرفش ازاي الراجل وافق يديها وهو لايعرفها ممكن لانه لقاها داخلة عندنا.احكموا انتم بقي ياجماعة زميلاتي استغلاليات ولا لا ، يمكن بيردوا اللي بعملوا فيهم ليا ، بس ده ميكنش مرة واحدة ، وصراحة من ساعتها بيدعي لهم دعاء لاتتخيلوه انتم اكيد عارفين انا قصدي ايه.

التاج

لقد وصل التاج ياشوشو .. وحاضر هجاوب عليها
من هو:أحب شخص لقلبك فى الدنيا؟
امي
انسان مستعد تضحي بحياتك - ركز فى كلمة حياتك- علشانة؟
امي
اسم أول حب؟
امي
اسم اخر حب(حتى الان)؟
امي
ما هو :اسم أجمل كتاب كتبه بشر قرأته ومحتفظ به حتى الان ؟
والله هو مش كتاب هي اجزاء من سلسلة رجل المستحيل

اسم كتاب-كتبه بشر برضة- انت متعلق بيه وبتقرأه كل فترة؟
السلسلة برده

اهم جهاز منزلى انت متعلق بيه او بتستخدمه كتير ؟
الكمبيوتر

شىء تحس بالراحة النفسية عندما تنظر اليه ؟
السماء بلونها الجميل

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
ايه اللخبطة دي مش عارفة

مكان تحس بالراحة عندما تدخله ؟

المسجد اولا ، ثم بيتنا ، وبالخصوص حجرتي

اجمل مدينة زرتها داخل مصر ؟
والله ياجماعة من غير كدب لم اخرج عن القاهرة يعني

أجمل مكان طبيعي رأيته داخل مصر؟
النيل خاصة في المساء

نوع هاتفك المحمول؟
من غير احراج لانه هدية وهو غالي عليا اوي حتي ولو كان اقدم موديل

سرعة بروسيسور جهازك ؟
تصدقوا معرفش ، بس اهو شغال

حجم ذاكرة –هارد- جهازك ؟
مش عارفة بس ياريت ميكنش زي ذاكرة صاحبته ، الا في الجانب الرقمي

المساحة التى تشغلها المواد الاسلامية على جهازك ؟

مش عارفة بس اساسا لايوجد عليه اي اشياء ترفيهية الا القليل

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
كده صح محدش يعرف يقدرها الا الله

أهم هدف انت واضعه لحياتك دلوقتى ؟
ان احقق مااحلم به واحقق مايحلم بيه والدي ليا

مواصفات فتاة –أو فتى للبنات- الأحلام بالنسبة لك ؟
ياجماعة متحرجونيش ، بس عموما ان تكون الاخلاق عنوانه والصدق كيانه والاخلاص بنيانه والتقدير اهم سماته وحب الخير حياته وكده بقي كفاية بلاش كلام من النوع ده

صف ما يأتى :شعورك لما بتسمع كلمة مصر؟
بحس باشياء ملخبطة شوية بس بحس بشي جميل

شعورك لما بتسمع كلام عن اليهود ؟

بلعنهم

شعورك لما بتشوف ضابط شرطة ؟

مش عارفة بس شعور مش حلو

شعورك لما بتشوف الكناس العجوز فى الطريق ؟
احزن جدا واتمني ان ااخذ المقشة منه واكنس بداله ، واشعر باني في نعمة كبيرة وبحمد ربنا

لون البطانية اللى بتتغطى بيها فى الشتاء ؟
هما اثنين بالتبادل نبيتي وبني في بيش

لون الجورب-الشراب- المفضل لديك ؟

ده علي حسب لون الطقم اللي انا لبساه

اذا داست قدمك فى الطريق على مخلفات اخراج حيوان- *** ولا مؤاخذة؟
سؤال مش حلو مش هجاوب عليه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
مش عارفة بس هو حر

احساس يراودك فى اشارة مرور مغلقة بسبب مسئول كبير؟
ابقي عايزة اشوفوه واولع فيه علشان بيعطل الطريق

يمرر التاج الي

عمري معاك

كلمات

قلوب حائرة

ايامنا الحلوة

مني

يوم روحاني طحن

انه يوم لا يتكرر كثيرا فهو غالبا مايكون كل حوالي ثلاثة شهور ان لم يكن اكثر من ذلك ، حيث نذهب لشراء الملابس سواء لنا او لاولاد خالتنا حيث نقضي هذا اليوم منذ الصباح حوالي الساعة العاشرة مابين اللف علي الملابس واختيار المناسب منها حتي ياتي موعد صلاة الظهر فنذهب سريعا ونتوضأ ونصلي في مسجد الحسين بين اعمدة هذا المسجد العريق التي يذكرنا باهل بيت الرسول (ص) وعقب الانتهاء من الصلاة نجلس للراحة من كثرة اللف وكلنا تامل في عراقة هذا الصرح العظيم بزخارفه وتصميماته التي تمثل بحق روعة الفن الاسلامي ، والله ياجماعة مااجمل هذا الشعور الذي اعيشه في تلك اللحظات وان اشعر انني اصلي واجلس في جزء يمثل احدا من اهل بيت رسولنا الحبيب (ص) انه منتهي النقاء والصفاء والعودة الي الله بكل جوارحي والدعاء فعلا من القلب ، ياه علي هذا الموقف العظيم المهيب ودائما اقول في نفسي اومال هتعملي ايه وايه هيكون شعورك لو روحتي المسجد الحرام ووقفتي امام الكعبة ياسلام ياجماعة لو ربنا ينولهالي قريبا وهذا اقصي مااتمناه واحلم به .اعود مرة اخري وعقب هذه الفترة من الصلاة والراحة نستكمل المسيرة مرة اخري من الشراء الي ان ياتي موعد صلاة العصر لنعود الي المسجد مرة اخري لتتكرر نفس العملية ، ثم نخرج والله ياجماعة لاتتخيلوا احساسي وانا اخرج من المسجد منتهي الحزن والاكتئاب والاحساس بالفراق ، فكم تمنيت في نفسي ان اسكن بجواره حتي لاافوت يوما دون ان اصلي فيه او حتي انظر اليه من الخارج .وعقب ذلك نقوم باكمال اليوم بشكل روش شوية فهناك سور طويل امام المسجد نجلس عليه ونشتري الذرة ونقعد ناكل ونحن نعيد النظر علي ماقمنا بشرائه وسط ضحك عميق من القلب بمنتهي الصفاء والحب ، ولايفوتنا في ذلك اليوم شرب عصير التمر من عم محسن الذي يقع في المنطقة الفاصلة بين نهاية شارع الازهر وبداية الدخول في منطقة الحسين الذي حفظ شكلنا ونشرب العصير في تلك الكوب الذي يشبه الابريق في شكله المصغر ومااحلاه من عصير.واخيرا نركب ونعود الي منزلنا بعد يوم طويل من اللف والضحك وشوية الروحانية التي تبعد بنا كثيرا وكثيرا عن هموم الحياة ، وهنا بقي لاتقولولي مصيف ولا نزهة في الحدائق ولا غيره جربوا بس مرة واحدة تعملوا زيي وانتم هتدعوا لي من القلب ، وكفاية كده ان وجعت دماغكم صح؟؟.

ياحلاوة ياولاد الرئيس هيتنحي

خبر جديد وعجيب فجأتنا به صحيفة المصريون لمحمود سلطان يقول الخبر ان الرئيس هيتنحي في اخر هذا العام في المؤتمر السنوي للحزب الوطني الديمقراطي زي مابيسموه تمهيدا لاجراء انتخابات لاختيار رئيس جديد ، وبصرف النظر عن مدي صدق الخبر دعوني اتأمل فيه شوية ، فهل يمكن ان نصدق هذا الخبر وهل فعلا ممكن ان يتنحي رئيسنا وصراحة في دي انا اشك اوي بس برده دعوني اعتقد ان الخبر صحيح فاقول ان الخبر ده يكون صادق في حالتين لا ثالث لهما وهما ان الرئيس ضمن بكل النسب المئوية ان ابنه سيكون هو الرئيس القادم وعايز يدربه في فترة حياته يعني يوجهه من خلف الستار واهو ينقل له خبرته الطويلة اوي في السيطرة علي البلد ، والثاني والذي يمدنا به التاريخ انه ضامن انه في كارثة هتحصل وقال يلا اعمل تمهيد زي مارئيسنا عبدالناصر قرر التنحي بعد هزيمة يونيو 1967م ، ربنا يسترها ويارب تكون الوساوس اللي في دماغي دي غير صحيحة ويكون الرئيس بتاعنا عايز يطبق الديمقراطية فقال ادي الفرصة لغيري يمكن يصلح شوية من اللي اتخرب وكفاية علي السنين الطويلة دي اللي حمكت فيها، يارب يكون ده صحيح .

انا بتعلم بفلوسي

كثيرا مااسمع هذه العبارة سواء كنت انا الذي اقولها او اسمعها من الاخرين كتعبير عن المعاناة الذي نشعر بها من ارتفاع مصروفات التعليم وان كل مرحلة تمر بها ترتفع مصروفاتها اضعافا مضاعفة ، ولكن هذه المرة سمعتها ولكن بشكل مختلف من احدي الشباب المرفه الذي لايحمل للدنيا هم بالبلدي كده .
تبدا القصة وانا ذاهبة الي احدي الجامعات الخاصة تدعي(...) للتقدم للعمل كمعيدة بكلية الاعلام بالرغم من طول الطريق اليها وارتفاع ثمن المواصلات التي اضاعت ميزانية الشهر بتاعي الا انني كنت متحمسة جدا للوصول اليها وبعد رحلة من المعاناة في المواصلات وصلت اليها ، وصراحة من الخارج تحس فعلا انها مصروف عليها اشجار وزرع ونظام وحتي حراس لابسين لبس شيك واستقبال رائع لاي زائر ، المهم دخلت الجامعة وسئلت عن الكلية وبعد معاناة لانه ببساطة الطلاب ميعرفوش الا كليتهم ولا مساعدة من احد وبسرعة ادركت اني بسال اشخاص خطا فرحت علي احد رجال الامن وسألته وبسرعة دلني عليها ودخلت الكلية وقمت بالاجراءات الخاصة بالتقديم وبسرعة خلصتها ، وعزمت الرحيل ولكني وجدت نفسي متعبة فجلست علي احدي الكراسي في المدخل هناك قلت ارتاح شوية وبعدين اروح وكان بجانبي مجموعة من الطلاب يتحدثون مع بعضهم ووسط الكلام عرفت ان عليهم امتحانات بس لامسكين ورق ولا كتب زي احنا مابنعمل ايام الامتحانات ولا في توتر ولاغيره ، صراحة فضولي دفعني ان اتكلم معاهم ودي فرصة لي اعرف ناس جدد وكمان لو شاء الله احتمال ادرس لامثالهم ، جلست اتكلم معهم في موضوعات كثيرة منها مجاميعهم في الثانوية وليه اختاروا مجال الاعلام ...الخ ، ولكني سالتهم عن نظام الدراسة في الكلية وليه هما لايذاكروا مع انهم عليهم الامتحان بعد قليل ، صراحة كان فيهم ولد مخلص بلغتهم لخصللي الموضوع في قوله " بصي ياستاذة انا هنا بيتعلم بفلوسي يعني الدكتور بيجي بفلوسي وبدخل المعمل (يقصد معمل الكمبيوتر ) بفلوس برده وحتي العامل اللي بينظف المدرج برده بفلوسي يعني كده انا ممكن ابقي عميد الكلية برده بفلوسي" وبالرغم من خفة دم واسلوب الطالب _الذي يبدو عليه انه بالسنة الاولي – البسيط والكجول الا اني ادركت اني غلبانة اوي بالرغم من اني ذاهبة للتقدم لكي ادرس لهم بس كلام الطالب حسسني انه ممكن يشتريني بفلوسه ودخلت في معركة كلامية معهم ولكن لاحياة لمن تنادي ، وساعتها ادركت اني لازم اروح لاني تاخرت وكمان كلامهم فور دمي فاستاذنت وصراحة هما قالوا لي خلينا قاعدين نتكلم مع بعض انتي ممكن تكوني استاذتنا بعد كده ،وقتها تمنيت ان لايسعدني الحظ واقبل في مثل هذه الكليات مش ضعف او قلة حيلة ولكنني تعودت علي نمط للتعامل مع اساتذتي فالرسول (ص) قدوتنا كان يقول "من علمني حرفا سرت له عبدا" بس ياريت احنا بس نحترمه ، وبعدها اخذت اول ميكروباص يبعد بي عن هذه الجامعة واردت ان ابعد عنها بسرعة بنفس درجة شغوفي للوصول اليها

قالوا ايه ... انتخابات

يحكي ان في مصر بلدنا العزيزة حاجة اسمها انتخابات قال ايه انتخابات للرئاسة ولمجلسي الشعب والشوري ، وام قالوا ايه ان اليومين دول فيه انتخابات لمجلس الشوري ، وكل مابفتح التليفزيون الاقي اعلان للتوعية بيقول ان صوتنا مهم ولازم نصوت لاختيار من يمثلنا ، وقال ايه كل لما اجي اغير علي الاعلان امي تقول لي لاتغيرتي دول بيوعوا الناس انهم لازم ينتخبوا ، صراحة هي شجعتني اني لازم اروح انتخب في الميعاد المحدد.
جاء اليوم الموعود يوم الانتخابات ، وكان عندي بعدها علي طول امتحان مهم اوي ، طب اعمل ايه ياجماعة انا لازم اذاكر ولازم "انتخب" علشان برده دا صوتي امانة ، خلاص بعد تفكير عميق اتفقت مع اخوتي يروحوا ينتخبوا ولو لقوا اللجان رايقة يرنوا عليا اصل برده اصواتنا امانة ولازم نعبر عن نفسنا ، خرج اخوتي للانتخاب وانا قاعدة في البيت بذاكر ومنتظرة الرنة للتوفير برده واحنا بنفهم بعض بالرنات ن انتظرت كثيرا بس محدش رن عليا ولا حتي من زميلاتي اللي كانوا بيرحوا معايا في انتخابات مجلس الشعب ، دا بقي دفعني ان اجي علي نفسي واقوم باجراء مكالمة علشان اسأل اخي الكبير وقلت له ليه مرنتش عليا فكان رده انتخابات ايه يابنتي اللجان قافلة وممنوع الانتخاب ، فقلت طب والله كويس هما مش عايزين يتعبوا الناس هما موضبين المرشحين مسبقا ومحددين مين ، وقلت طب ليه التعب ده وعمل الدعايا اللي بتكلف ملايين الجنيهات من الاحسن بدل مافي مقاعد بالتعيين في المجلس ومقاعيد بالتعيين يخلوها كلها تعينات .
بس ياجماعة فضولي الصحفي دفعني ان افتح التليفزيون ومواقع النت واشوف ايه اللي بيحصل وجلست اقلب في القنوات والمواقع وياجماعة تلاقي التليفزيون بتاعنا بيقول الانتخابات تسير بحرية وهدوء ، وحولت علي الجزيرة لقيت مقتل شخص في الانتخابات ، والمواقع الرسمية علي نفس الشكيلة ، ومواقع اخري تنقل احداث العنف وغلق اللجان ، طب اصدق مين ياجماعة بس صراحة ملت للجزيرة والمواقع الاخري الغير رسمية ، مهو انا درست اعلام واعرف برده شوية افرق.، وصراحة نسيت نفسي امام المواقع والتليفزيون ونسيت الامتحان ، حتي جائني تليفون من زميلة بتسالني عن شئ في المنهج ساعتها افتكرت اني عليا امتحان ، وقلت مش لو كان عندنا شئ اسمه انتخابات كنت رحت وانتخبت ووفرت الوقت.
وبالصدفة جاء الامتحان صعب اوي بصراحة ساعتها دعيت من كل قلبي وقلت (ربنا يخلي الحكومة الديمقراطية) وقلت برده انه لازم نغير اسم الانتخابات الي اصلها كلمة مش لايقة علينا وبضيع وقتنا وانا بقترح اسم (التعينات) ، بس كده ربنا يسترها في النتيجة مش عارفة ساعتها هدعي بايه.

هو العمر بالساهل

هحكي ليكم موقف طريف وفظيع في نفس الوقت يعني اثنين في واحد بس مش "برت بلس شامبو وبلسم" ، تبدا الحكاية وانا قاعدة في الشغل علي مكتبي ومنهمكة في العمل الضمير بقي ياجماعة فاذا بسكرتير تحرير الموقع اللي بشتغل فيه يرسل لي عبر برنامج المحادثة الداخلية(الماسنجر) رسالة وهي كانت حادثة وقعت في شارع ناهيا ذلك الشارع التي يؤدي الي قريتي العزيزة والحادثة تقول ان سائق ميكروباص واثنين تباعين قاموا بقتل راكب ذبحا بالمطواة لانه رفض يدفع ربع جنيه اجرة قام السائق بزيادتها ، وفي الخبر المتهمين بيحكوا اللي حصل وبيقولوا ان الراكب كان مؤدب معاهم ولكنه رفض فقط دفع الربع جنيه علشان كده هما قرروا يؤدبوه قاموا ذبحوه ، وهما صراحة من كلامهم الجماعة حساسين وكانوا ندمنين ، المهم قرأت الحادثة وكلي استغراب من الموقف علشان ربع جنيه يقتل انسان .
وظللت وسط الطريق وانا مروحة البيت افكر في الحادثة وفي الموت وهل الامر بالساهل كدة وعمر الانسان هين لهذه الدرجة ، وعلي الموقف قابلت احدي زميلاتي وركبنا سوا ، وصممت لازم تدفع الاجرة ، وبعد ماالميكروباص تحرك السائق قال ان الاجرة 75 قرش وهي اساسا 50 قرش فاعترض الركاب علي ذلك ومنهم زميلتي والجلالة كانت وخداها اوي ، ووسط كل هذا تركت كل ده وحلفت انا اني ادفع الاجرة لي ولها ،وقلت في نفسي هو العمر بالساهل ، في داهية النصف جنيه الزيادة ، بس متقولوش عليا جبانة......

عودي ياصديقة عمري

صحيح ان الفرد لايقدر قيمة من حوله الا اذا بعدوا عنه ولايستطيع ان يعبر لهم عما بداخلهم الا عندما يبعدوا عنه ، والبعض يعتقد ان ذلك للاهل فقط سواء ابا او اما او اخوة.... ، ولكنني اضع بجانب ذلك الاصدقاء ، وانا فعلا الان اؤكد بشدة صحة هذه المقولة فقد شعرت بها واعاني منها الان في غياب صديقة عمري ، وهي تلك الصديقة التي تعرفنا علي بعضنا البعض ونحن في المرحلة الاعدادية في الصف الاول الاعدادي علي الرغم من اننا جيران الا ان علاقتنا كانت سطحية ، وقويت العلاقة بيننا من خلال اللعب الذي جمعنا في ذلك الشارع الصغير الذي نسكن فيه ، واصبحت حياتنا واحدة نذاكر سويا ونلعب سويا ونخرج سويا واصحابنا واحدين ، حتي ان زملائنا يسموننا "التؤام" ، ونحن نتحدث بلسان واحد ولايقبل منا ان يسمع علي الاخر كلمة تهينه في غيابه حتي ان بعضنا كان يزعل من الاخرين لانه يمس الاخر وان كان بشكل بسيط ، فنحن اتفقنا من البداية علي اشياء وان لم تكن مرتبة الا انها من تكرارها اصبحت نمطا في حياتنا ، هكذا عشنا وكنا في فصول واحدة ولم يفرق بينا في الدراسة الا الاختلاف في الكليات الا اننا حرصنا علي ان يشجع بعضنا البعض فكنا نذاكر سويا علي الرغم من اختلاف التخصص .
وقبل ايام قليلة اذا بها تاتي لي في بيتي كعادتنا ان نري بعض يوميا وتبلغني انها سوف تذهب الي شغل جديد ونظامه انها تظل به دون عودة الي بيتها لمدة 25 يوما وبعد مناقشة في هذا الموضوع لااريد ان اذكرها اتفقنا علي ان نجلس سويا مدة طويلة قبل ان تذهب للشغل علي ان يكون اليوم المسبق لتلك اليوم الذي تذهب فيه للشغل ، ولكنني نسيت ذلك فجاءت الي بيتي فوجدتني نائمة ولم ترغب في ازعاجي واذا بها تذهب الي الشغل مبكرا دون ان اراها ، وقمت في الصباح وتذكرت ذلك وانا البس استعدادا للخروج للشغل فغضبت جدا من نفسي اني نسيت ان اذهب اليها وغضبت منها انها لم تصحيني من النوم بعد ان قالت لي امي انها مرت علي ، وظللت طوال الطريق افكر في كيف استطيع ان اصبر دون رؤيتها 25 يوم وتمنيت ان تترك الشغل وتعود ، واثناء عودتي من الشغل وفي الميكروباص اذا بالسائق يشغل اغنية علي الرغم من عدم اهتمامي بمثل هذا النوع من الاغاني المهم الا انها لفتت انتباهي فهي تقول "بحبك وحشتيني .. بحبك وانتي نور عيني" وتصدقوني انني كدت ان انهمك في البكاء الا انني ادركت من حولي فحاولت ان افكر في شئ اخر ، واول مارجعت البيت ذهبت الي بيتها احاول ان احصل علي اي رقم تليفون لشغلها لعلي اتصل بها واقول لها وحشتيني ولكن دون فائدة ، والان لا املك الا ان اقول لها "عودي ياصديقة عمري" .
في النهاية ادعوكم زملائي ان تحافظوا علي من حولكم وان تحاولوا ان تعبروا لهم عن مشاعركم تجاههم ولا تنتظروا ان يذهبوا من حولكم.

قالوا ايه ... انتخابات

يحكي ان في مصر بلدنا العزيزة حاجة اسمها انتخابات قال ايه انتخابات للرئاسة ولمجلسي الشعب والشوري ، وام قالوا ايه ان اليومين دول فيه انتخابات لمجلس الشوري ، وكل مابفتح التليفزيون الاقي اعلان للتوعية بيقول ان صوتنا مهم ولازم نصوت لاختيار من يمثلنا ، وقال ايه كل لما اجي اغير علي الاعلان امي تقول لي لاتغيرتي دول بيوعوا الناس انهم لازم ينتخبوا ، صراحة هي شجعتني اني لازم اروح انتخب في الميعاد المحدد.
جاء اليوم الموعود يوم الانتخابات ، وكان عندي بعدها علي طول امتحان مهم اوي ، طب اعمل ايه ياجماعة انا لازم اذاكر ولازم "انتخب" علشان برده دا صوتي امانة ، خلاص بعد تفكير عميق اتفقت مع اخوتي يروحوا ينتخبوا ولو لقوا اللجان رايقة يرنوا عليا اصل برده اصواتنا امانة ولازم نعبر عن نفسنا ، خرج اخوتي للانتخاب وانا قاعدة في البيت بذاكر ومنتظرة الرنة للتوفير برده واحنا بنفهم بعض بالرنات ن انتظرت كثيرا بس محدش رن عليا ولا حتي من زميلاتي اللي كانوا بيرحوا معايا في انتخابات مجلس الشعب ، دا بقي دفعني ان اجي علي نفسي واقوم باجراء مكالمة علشان اسأل اخي الكبير وقلت له ليه مرنتش عليا فكان رده انتخابات ايه يابنتي اللجان قافلة وممنوع الانتخاب ، فقلت طب والله كويس هما مش عايزين يتعبوا الناس هما موضبين المرشحين مسبقا ومحددين مين ، وقلت طب ليه التعب ده وعمل الدعايا اللي بتكلف ملايين الجنيهات من الاحسن بدل مافي مقاعد بالتعيين في المجلس ومقاعيد بالتعيين يخلوها كلها تعينات .
بس ياجماعة فضولي الصحفي دفعني ان افتح التليفزيون ومواقع النت واشوف ايه اللي بيحصل وجلست اقلب في القنوات والمواقع وياجماعة تلاقي التليفزيون بتاعنا بيقول الانتخابات تسير بحرية وهدوء ، وحولت علي الجزيرة لقيت مقتل شخص في الانتخابات ، والمواقع الرسمية علي نفس الشكيلة ، ومواقع اخري تنقل احداث العنف وغلق اللجان ، طب اصدق مين ياجماعة بس صراحة ملت للجزيرة والمواقع الاخري الغير رسمية ، مهو انا درست اعلام واعرف برده شوية افرق.، وصراحة نسيت نفسي امام المواقع والتليفزيون ونسيت الامتحان ، حتي جائني تليفون من زميلة بتسالني عن شئ في المنهج ساعتها افتكرت اني عليا امتحان ، وقلت مش لو كان عندنا شئ اسمه انتخابات كنت رحت وانتخبت ووفرت الوقت.وبالصدفة جاء الامتحان صعب اوي بصراحة ساعتها دعيت من كل قلبي وقلت (ربنا يخلي الحكومة الديمقراطية) وقلت برده انه لازم نغير اسم الانتخابات الي اصلها كلمة مش لايقة علينا وبضيع وقتنا وانا بقترح اسم (التعينات) ، بس كده ربنا يسترها في النتيجة مش عارفة ساعتها هدعي بايه.