مواقف نصف كوم

موقف "1"
مقلب نصف كوم من زميلات الطفولة والدراسة وبنات بلدي – الجدعات اوي! – بدايته تليفون من ".... " نصه :"ازيك يا.. ؟ عاملة ايه؟ بقولك زميلتنا ... رجلها اتكسرت وكلنا رحنا لها وهي زعلانة منك اوي"
ارد بكل براءة :"والله معرفش ازاي متقولوش ليا وانتم رايحين "
تنتهي المكالمة معها واتصل سريعا بزميلتي صاحبة الرجل المكسورة! لتقول معاتبة :"والله انتي صداقتك زفت وعلينا بخسارة موش بتعبري حد " وكلام من هذا القبيل" ، لارد بكل اعتذار وسماح – مسكينة انا - واقول لها سااتي ليكي واصلحك ، لتقول :"حددي ليا ميعاد واوعي تتصلي تقولي موش جاية " ، بكل براءة حددت الميعاد ، وفي اليوم المحدد ذهبت في بداية دخولي لمنزلها استقبلتني والداتها سلمت عليها وعاتبتني هي الاخري علي عدم زيارتهم ووسط الكلام قلت لها :"الف سلامة علي ..." لترد :"هي مالها؟!"
هنا بدأت ملامح المقلب تتضح
ادخل غرفتها لاجدها تستقبلني بضحك شديد وهي سليمة – من غير جبس- وسط تجمع من زميلاتي وكل منهن تضحك وتضرب كف علي كف علي اني شربت المقلب .
وقلبوا الموقف ضدي واني موش بسال عليهن واني مقصرة والموقف ده علشان عايزني اقعد معاهم ، فلم يجدوا الا الخطة الجريئة دي.
موش هقول ايه كان رد فعلي وقتها
بس صراحة قضيت معهن وقت جميل وان كان قصير جدا
وبعدها بحوالي ثلاثة ايام اذا بزميلتي هذه تتصل بي لاقول لها باستهزاء في بداية الكلام :"هاه .. ايه اللي اتكسر المرة دي فيكي أيدك ولا ذراعك!!"
لترد قائلة :"والله العظيم رجلي أتكسرت .. ذنبك طلع عليا "
لم اجد وقتها الا قول :"لاتعليق"

"موقف 2"
في اثناء عودتي لبيتي قررت شراء بعض المستلزمات من احدي المكتبات وما ان قربت منها وجدت تجمع من مدرسين المرحلة الاعدادية لي ، وقفت سريعا وفكرت هل اسلم عليهم ام لا؟ ، بس قلت ممكن يكونوا موش فاكرني وكمان اتحرجت اقف واسلم علي خمس مدرسين ولو افتكرني واحد الثاني موش هيفتكر ، وقلت اكيد هما موش هيعرفوني وقررت ان ادخل سريعا الي المكتبة وفعلت ، فاخذت طريقي الي داخل المكتبة دون نظر حولي وسط المدرسية وماان وضعت قدمي داخل المكتبة الا واجد صوت من خلفي يقول :"انتي يابنت اللي اسمك "....." ، وقفت سريعا وادركت انه صوت احد مدرسيني ، التفت سريعا ووشي في الارض – موش قادرة ارفع وشي في وشه – ورجعت للخلف وقلت له ازي حضرتك يااستاذ .... ، فرد سريعا وقال :"كويس ماانتي عارفة اسمي كويس اهو"
ولسة هبدا ابرر موقفي فقاطعني مدرس اخر وقال اوعي تقولي أي كلمة شكلك موش اللي هو ده موقف يتعمل منك ، اردت ان اتكلم فقاطعني سريعا :"متحوليش تبرري ، فقطاعته :"والله ॥ "فقاطعني اوعي تقولي ولاكلمة ، ويرد اخر ويقول :"هم البنات كدا تبقي شايفاك كويس وعارفاك ومتكلمكش " ، جيت ارد ولكن برده بلا فائدة.
وسلمت عليهم وكلهم لوم لي وانا موش عارفة ارد باي كلمة ابرر موقفي ، سالوني ان احوالي وانا ايضا ، وضحكت معهم وقلت لهم جميل هذا التجمع هو انتم هتعملوا اضراب ولا ايه ، فردوا لا علشان نافشك وانتي بتهربي
بس صراحة كان موقف نصف كوم مني ، بس اعمل ايه ؟!.


موقف "3 "

هو موش موقف واحد بس مجموعة من المواقف اثارها عندي موقف اخير من زميلات العمل اتهموني باني شخصية عملية جدا ، وكثير جدا بيقول ليا كدا حتي اهل بيتي ، طبعا برد واقول ابدا انا شايفة نفسي شخصية عادية جدا بس بحب انظم وقتي وموش بضيعوا واقول دايما :"الوقت كالسيف اذ لم تقطعه قطعك حتتا حتتا "

موش عارفة بس يبدو مع التكرار في هذه المقولة :"انتي عملية " كان لازم اقر واعترف باني كذلك علي نفس لغتهم
ولكن بلغتي هو ده الطبيعي تنظم وقتك كويس .. لاتضيع الوقت .. بس برده لازم شوية للترفيه والامور الحياتية الاخري

بس بحاول اقنع نفسي :"اني عملية جدا" ومنه لازم اتغير ، بس بسال نفسي هل ممكن اقتنع بذلك؟!