انا مين ؟???????!!!!!!

لايخدعكم العنوان أنا والحمد لله لسة لم افقد الذاكرة انا لازلت اتذكر اسمي ، أقول لكم حكاية أنا مين دي
في احدي المرات خير اللهم اجعله خير النت كان فاصل وأنا كنت متضايقة طبعا جدا جدا ومش عارفة اعمل إيه ، فهداني عقلي أنا امسك كام ورقة وقلم واكتب مقال لمجلتنا "ناهيا الغد" وقعدت افكر اكتب ايه ؟ اكتب ايه ؟ ، ووسط هذا التفكير العميق ، اذا بصديقتي العزيزة تنادي علي ، وتاتي وتقطع حبل افكاري وتجلس معي ، واذا بها تمسك الورق والقلم وتكتب عنوان عريض جدا وهو "انا مين؟؟؟!!!" فقلت لها انا ممكن اجوبك وقلت "انتي (اسمها) هههههههه ، شوفتي بقي انا شاطرة ازاي" فضحكت جدا وقالت:" انا لااقصد ذلك" ، فقلت لها :"اومال تقصدي ايه ياعم فرويد" – اصل صديقتي دي خريجة علم نفس واجتماع وبتشتغل اخصائية اجتماعية ونفسية – وعلشان كده تلاقوني معقدة وبشد في شعري منها .
فردت بكل ثقة وتكبر وهي تنظر لاعلي :"يابنتي انا اقصد من كتابة العنوان ده اني اريد ان اكتب كيف اري نفسي واقارن رؤيتي دي بما يراني الناس" ، فقلت لها :"بصي ياستي انا لسة شاربة كوباية شاي ومعمرة دماغي ومش عايزة الدماغ ده يروح بكلامك الفاضي والمعقد ده ، بصي ياستي والنبي وانتي معايا انسي علم النفس والعقد دي بتاعتك علشان انا فاضل بيني وبين السرايا الصفرا شبرين ، والظاهر انك هتخليني انطهم".
فقالت :"بصي بقي سيبك من الضحك ده وخليكي جد شوية" ، صراحة حسيت انها بتكلم بجد واني انا بسخر منها .
فقلت لها :"براحة كده قولي انتي عايزة ايه وتقصدي ايه" ، فردت :"ركزي معايا كده وبصي احنا هنلعب لعبة صغيرة جدا كل واحد يمسك ورقة وقلم ويكتب هو مين؟ في ضوء تقييمه لذاته من عيوب ومزايا واهداف وحاجات من دي ، وبعد كده نبدل الورق وكل واحد يضع للثاني درجة من 10 في ضوء رويته للاخر ، يعني زي امتحان بسيط كده "
فرديت سريعا وقلت لها:"احنا في الليلة البيضا دي مش هنخلص ، انتي مالك يابنتي ، انا والحمد لله خلصت امتحانات ، انا محسساني اننا في ثانوية عامة ، ماتكبري شوية"
فنظرت لي نظرة ضاحكة ومستغربة وقالت :"بجد بقي يلا نجرب ونشوف انتي كده كده ساقطة بالثلث ، بصي يلا نولي شرف المحاولة"
صراحة استحليت اللعبة وقلت نلعب وماله وفعلا أمسكت الورقة والقلم وهي كذلك وكتبنا كلام كتيير سواء سلبيات وايجابيات بدرجة واضحة كيف يري كل منا نفسه وكل ذلك تحت عنوان (انا مين؟)
وجاءت اللحظة الحاسمة لحظة لم ورق الاجابة والتصحيح وقمنا بالتعليم _ وفعلا وجدت الكثير من النقاط الواضحة جدا في اجابات صديقتي وعجبني جدا توازنها النفسي "بلغتها طبعا" وقدرتها علي تحديد نفسها في سطور وتقيمها لذاتها –طبعا مهي عملالي فرويد – وصراحة وجدت الكثير من النقاط التي تتفق مع رويتي انا شخصيا لها والكثير ايضا من الاختلافات ولكن وللحق كانت اقل من أوجه الاختلاف ومعرفتش طبعا أضع درجة لها _ لأنني صديقتها _ وطبعا امثل الجانب الكويس لها يعني انظر إليها دائما من نظرة صديقة حبيبة وبالتالي افترض حسن النية في تصرفاتها واراها مبالغة في أي سلبيات تكتبها عن نفسها .
وطبعا باعتبارها المحللة النفسية الخبيرة _ إيه رأيك في البوقين الحلوين دول يا ست "...." أي خدمة _ كانت لابد ان تضع درجة ليا وجاءت اللحظة الحاسمة جدا جدا لحظة اعلان النتيجة وبلا فخر وغرور وضعت ليا درجة 4 من 10 يعني فاشلة بالثلث وهعيد السنة ، وماشاء الله وبلا حسد قعدت تمدح فيا وتقول ليا :"يافاشلة يافاشلة يافاشلة ، مش كنت بقلك ذاكري وادي جزاء اللي مايسمعش كلامي"
بس صراحة عجبتي الفكرة جدا جدا جدا وهي ان الانسان في الاغلب لا يستطيع ان يحدد نفسه في نقاط ولو استطاع فطبعا الإنسان أما إن يكون راضي عن نفسه وبالتالي يري أن الناس من حوله يروه بشكل كويس ، او يكون غير راضي عن نفسه وبالتالي يري نفسه فاشل في عيون الآخرين ، او في قمة التوازن والرضا المصحوب بالايجابية التي يراها في عيون الآخرين عنه.
طبعا ده قد يكون بشكل مثالي شويتين ، لأنك لا تدرك نية من حولك لك ولو عرفت الظاهر لا تستطيع أن تعرف الباطنة .
وكمان في نقطة أساسية جدا أن هناك اختلافات فردية بين الأشخاص فما أراه ايجابي قد يكون عند غيري سلبي والعكس وهذا نابع من طبيعة المجتمع التي تربي فيه كل رد والمجتمع هنا قد يكون الأسرة الصغيرة التي نشا فيها ثم المدرسة فالقرية أو المدينة فالاحتكاك الخارجي من خلال الجامعة والعمل إلي أخر ذلك.
شوفتم بقي العقد واللخبطة دي يا جماعة يلا بعض ما عند الست فرويد بتاعتنا
أخيرا ، كل واحد من قرائي الكرام يحاول منكم أن يمسك ورقة وقلم ويكتب في وسط السطر كده عنوان كبير وهو "أنا مين؟" ويحاول الإجابة عليه ويشوف ، وتبقي احكوا ليا